مستشفي الصالحية ( رحمه الله) ومعامل تحليل ( سرقة جيوب المرضي ) وعيادات (خدفلوسي في صحتك واتكرع )

الصالحية واهلها الفقراء ومتوسطي الحال والاغنياء تظهر فيهم الامراض بصورة لم تكن في الماضي ومابين اباطرة الاطباء والعيادات في القاهرة والمستشفيات الخاصة في الزقازيق وفاقوس والقاهرة يروح المرضي بكل مستوياتهم في رحلة الكر والفر ويبيع اهل المريض مايملكون احيانا ليسددوا تكلفة العلاج الباهظ والذي لا يأتي بنتيجة سوي دفع الفلوس لاغنياء الاطباء ومستشفيات الفندقة التي لاتمتلك اي قدرة طبية حقيقية سوي الاحتراف في سرقة فلوس الصالحاوية سواء في فاقوس أوالزقازيق أو القاهرة..

لكن لايغيب عن بالنا ابدا سؤال مؤلم ..اين الخدمة الطبية هنا في الصالحية ؟؟

تعالوا نطوف علي ربوع بلدنا الطيب ونزور مستشفي الصالحية ..

هل هذا مستشفي كان له ماضي وتاريخ جميل شهد به القاصي والداني وكان في الماضي طبيب المستشفي وعماله وممرضوه الذين كان اغلبهم يجيء من محافظات بعيدة ويستقر في الصالحية ولا يخرج منها ويستوطن هنا ويندمج في مجتمع الصالحية ولا تسمع عن الرشوة ابدا ولا المحاباه والواسطة بل كان طبيب المستشفي اشبه بالمتعبد في محرابه يقوم بعمله ليل نهار ويأتي للمرضي في المنازل ليل نهار وفي اي وقت وكيف ننسي (ابوجودة) ذلك العامل البسيط الذي كان يحمل شنطة الطبيب وكيف ننسي الخدمة التي تقدم للمرضي من اهالي الصالحية وكذلك الادوية والرعاية من الجميع ..

الان انظر للمستشفي اشبه "بالجبانة" أو المقبرة.. ولا ترقي ابدا لعيادة خاصة بل هي بالفعل منزل خاص مملوك لاحد المماليك الجدد في الصالحية يدعي مهنة الطب ولا يجيد سوي تكفين الميت او ادخاله الي عالم البرزخ بشهادة شفوية منه قبل المكتوبة ..ان المستشفي فقط تحول الي مكتب لاستخراج شهادات الوفيات وزيارته هي فقط من ضمن اجراءات التجهيز للموت قبل الغسل والتكفين ثم عذاب القبر أو نعيمه اللهم ارحمنا يارب من عذابك ..

ثم ارحل معي ايها الاخ الصالحاوي الي زيارة عيادات الاطباء الخاصة والتي في بعضها فقط مناسبة لا للعلاج او الكشف علي المريض لالا ..ولكن هي زيارة من المريض للتبرع لاخواننا اما في غزة او بناء الدور الثالث للطبيب الغلبان او زيادة رصيد الطبيب في البنك وهنيالك يافاعل الخير والثواب وهي برضه صدقة لو احدث لها المريض نية الصدقة ( داووا مرضاكم بالصدقة ) حتي لوكانت للطبيب المزعوم اللي مش عارفة حاجة عن اي حاجة في الطب ابدا والله ان حلاق الصحة زمان معلوماته اكتر !!!

انا مش بقول كلهم لان فيهم ناس محترمين جدا وعندهم رغبة لخدمة اهالينا في الصالحية وعندهم موهبه طبية مبكرة وربنا يوفقهم ....

ثم تعالي ايها القاريء الصالحاوي الكريم وبص علي الاجزخانات اللي بين كل صيدلية وصيدلية موجود برضه صيدلية ولاينافس عدد الصيدليات في الصالحية الا محلات الاتصالات !..واغلبها بل كلها شغال علي الكشف المجاني علي العيانين والمرضي ووصف الدواء اللي مركون جوه الصيدلية وعينك ماتشوف الا النور رواج جامد جدا جوه الصيدليات وبالذات ليلة الجمعة وبعض الليالي الاخري علي حبوب منشطة جنسيا وماتعرفش مصنوعة فين جايز ابوكبير وجايز في اماكن اخري وهيه السبب في سعر الجبس بتاع المباني ولع لانها مقلدة ومغشوشة والصيدليات يادوب تبيع منها لبتوع الصالحية ونوع اخر من تقليد حبوب المسكنات لزوم العملية انه يبقي في الماتش الرياضي شوطين تانيين ربع وربع يبقي اربع اشواط ومش مهم الاجوان ممكن برضه يلعبوا ضربات جزاء بعد ده كله ...!!

المهم في موضوع الصيدليات دي تربحها المبالغ فيه بسبب بيع الادوية من غير روشتة وبالبلدي وكل عامل في الصيدلية عامل طبيب وفين يوجعك ويصرف اي دوا  لاي حد جاي يشتكي من الم في جسمه العامل بتاع الصيدلية يقوله في دوا كده ولايهمك ويديلة الدوا من غير روشته طبيب اما علشان الصيدليه حالها يمشي او ان الدكاترة في العيادات بتوع الصيدليات حفظوا  روشتاتهم المتكررة لكل المرضي بنفس العناصر حفظوها عمال الصيدليات وحسوا ان مش فيه فرق وبيدوا اي واحد عمال علي بطال واللي فتح الصيدلية شرقان عاوز يكسب ويلم فلوس علي حساب الغلابة والفقراء واشمعنه همه مش يلعبوا في المكسب الحرام والمتاجرة في امراض الناس !

تعالوا معايا نروح في اخر رحلتنا التي تسبق" الجبانة" علي طول نروح حاجه كده اسمها في الصالحية معامل التحاليل ( تحاليلي يمه)  تحاليل ايه دي دي اسمها تحليل سرقة فلوس المرضي والله الذي لا اله الاهو انا اعرف ناس منهم كانو شغالين سواقين علي عربيات نص نقل في البطيخ وفجأة لقي سبوبة المعامل دي بتكسب راح بطل شغل السواقة وفتح معمل ولانه تصادف انه حصل علي شهادة بكالوريوس علوم او فني خريج معاهد صحية وكل ماشي وكله بيحلل وكله بيغش ولا هو فاهم حاجة ولان السبوبة بتاعة معامل التحاليل ارخص في ادواتها من تجهيز مطاعم الفول والطعمية بتوع الفول والطعمية هيجيب قدرتين المونيا وطاسة قلية للطعمية واطباق وحلل ومعالق وبعد كده المونة عبارة عن خمسة كيلوفول بلدي مكمور وخمسة مدشوش.... تعالي علي معمل التحاليل بتاع المعهد الصحي او السواق سابقا هيجيب ايه شوية انابيب وبتاعة بتلف كده علشان تحليل الدم  متعرفش معمولة في ورشه هنا بموتور نص حصان وتربيزة ومكتب وسكرتيرة دبلوم تجارة وكل معمل مربط مع طبيب علشان يبعتله ويتصدق عليه بسبوبة بدل ماينش دبان من ريحة البراز والبول اللي فاحت من غير تحلييل ( ماهو ممكن تكون العينه من عندهم )..

وبعد ده كله تقولي مريض الصالحية ليه مايروحش الزقازيق ولا فاقوس ولا مصر ويبيع اللي وراه وقدامه وشقا عمره علشان يتعالج 

طب ده اللي عنده امكانيات.. طب الفقير اللي معندوش يعمل ايه ...؟؟

يروح احسن مستشفي الصالحية ويعمل من دلوقتي شهادة وفاة ويوصي الطبيب واللا اللكاتب يحوله علي جبانة الشيخ نصار اقرب يستني فيها الموت واهو يتسلي بالقطر رايح جاي وجبانه فيها نور وقريبة من العمار...!

وعمار ياصالحية وربنا معاكوا يافقرا الصالحية !!

كتبه : محمد امام نويرة